Дубровенскі раён

Дубровенскі раён

Герб
Краіна	Беларусь
Статус	раён
Уваходзіць у	Віцебская вобласць
Адміністрацыйны цэнтр	Дуброўна
Афіцыйныя мовы	Родная мова: беларуская 78,41 %, руская 20,9 % Размаўляюць дома: беларуская 31,3 %, руская 60,82 %
Насельніцтва (2009)	16 974 чал. (19-е месца)
Шчыльнасць	13,58 чал./км²
Нацыянальны склад	беларусы — 93,72 %, рускія — 4,94 %, іншыя — 1,34 %
Плошча	1 249,70 км² (19-е месца)
Часавы пояс	UTC+2
Афіцыйны сайт

Дубровенскі раён — адміністрацыйная адзінка ў складзе Віцебскай вобласці. Утвораны 17 ліпеня 1924 г. Падзелены на 9 сельскіх саветаў.

Геаграфічнае становішча

Размешчаны на паўднёвым усходзе Віцебскай вобласці. Мяжуе з Аршанскім і Лёзненскім раёнамі Віцебскай вобласці, Горацкім раёнам Магілёўскай вобласці, Краснінскім і Руднянскім раёнами Смаленскай вобласці Расійскай Федэрацыі.

Прырода

Паверхня раёна хваліста-платападобная, раўнінная. Паўднёвая частка знаходзіцца ў межах спадзістахвалістага Смаленскага ўзвышша. На поўначы плоская з забалочанымі ўчасткамі і асобнымі марэннымі ўзгоркамі Лучоская нізіна. У тэктанічных адносінах раён прымеркаваны да Аршанскай упадзіны. Зверху залягаюць пароды антрапагенавага ўзросту паазерскага (на поўнач), сожскага, дняпроўскага, зрэдку бярэзінскага зледзяненняў.

У раёне разведана 11,5 млн т геалагічных запасаў торфу, што адпавядае 2,2 млн т паліва ў нафтавым эквіваленце. Абшырныя лясныя рэсурсы: больш за 35 тыс. га (29 % плошчы раёна).

Сярэдняя тэмпература студзеня −8º, ліпеня +17,8 °C. За год выпадае 618 мм ападкаў.

Па тэрыторыі Дубровенскага раёна цячэ рака Дняпро. На тэрыторыі раёна часткова праходзіць водападзел паміж рэкамі Балтыйскага і Чорнага мораў — Заходняй Дзвіной і Дняпром.

Насельніцтва

Насельніцтва ў 1971 складала 32,1 тыс. Насельніцтва ў 2006 — 19,7 тыс. чал., гарадскога — 8,9 тыс. чал., сельскага — 10,8 тыс. чал. Тэндэнцыя — скарачэнне колькасці насельніцтва (каля 1 % у год). Каэфіцыент дэпапуляцыі (суадносіны памерлых да народжаных) у 2005 склаў 2,6 і перавысіў максімальна дапушчальнае крытычнае значэнне, прынятае ў свеце за 1.

Высокая забяспечанасць людзьмі працаздольнага ўзросту — 60 %, узроставая структура насельніцтва — аптымальная, эканамічна эфектыўная. Высокі ўзровень беспрацоўя — 2,1 %, асабліва сярод жанчын.

Гаспадарка

Буйнейшыя прадпрыемствы:

• Дубровенскі льнозавод, ААТ
• Дубровенскі камбінат прамысловых тавараў, ААТ
• філіял Дубровенскі ААТ "Аршанскі малочны камбінат"
• філіял Дубровенскае ДРБУ № 108 КУП "Віцебскаблдарбуд"

Транспарт

Па тэрыторыі раёна праходзяць чыгунка і аўтадарога Брэст — Масква. Дуброўна аўтадарогамі звязана з Оршай, Горкамі, Асінторфам, пасёлкам Красным (РФ). Праз тэрыторыю раёна праходзяць нафтаправод «Дружба» і газаправод «Ямал — Еўропа».

Культура

Міжнародны фестываль песні і музыкі Падняпроўя «Дняпроўскія галасы ў Дуброўна».

Вядомыя асобы

• Аляксей Дудараў — беларускі драматург (нарадзіўся ў в. Кляны)
• Уладзімір Фёдаравіч Ладысеў
• Сяргей Ракіта (1909—1942) — беларускі паэт (нарадзіўся ў в. Ліцвінава Аршанскага павета)
• Сяргей Канстанцінавіч Заранка
• Іван Якаўлевіч Лепешаў
• І. А. Авекаў (1919—1943) — лётчык, Герой Савецкага Саюза
• В. І. Гапееў (1951-) - дзяржаўны дзеяч Беларусі, дыпламат

Гл. таксама

• Рака Расасенка
• Рака Вярхіта

Літаратура

• Дубровенскі раён // Рэспубліка Беларусь: вобласці і раёны Рэспубліка Беларусь : энцыклапедычны даведнік / склад. Л.В. Календа. – Мн., 2004. – С. 131–132.
• Дубровенский район // Республика Беларусь : энциклопедия : в 6 т. / редкол.: Г.П. Пашков [и др.]. – Мн., 2006. – Т. 3. – С. 458–459.
• Дубровенский район // Республика Беларусь. Витебская область / Управление идеологической работой Витебского областного исполнительного комитета ; [редкол.: В.П. Андрейченко [и др.]. – Витебск, 2005. – С. 166–169.
• Памяць: Дубровенскі раён: гісторыка-дакументальныя хронікі гарадоў і раёнаў Беларусі: у 2 кн. / рэдкал.: А. Гаўруцікаў і інш.; мастак Э. Жакевіч. — Мн., 1996—1997.

У Сеціве

• Праект Віцебскай абласной бібліятэкі ПРЫДЗВІНСКІ КРАЙ: ГІСТОРЫЯ І СУЧАСНАСЦЬ
• Пералік аб'ектаў гісторыка-культурнай спадчыны Дубровенскага раёна (тар.) 

Зноскі

	Адміністрацыйны падзел Віцебскай вобласці
Раёны:  Аршанскі • Бешанковіцкі • Браслаўскі • Верхнядзвінскі • Віцебскі • Гарадоцкі • Глыбоцкі • Докшыцкі • Дубровенскі • Лепельскі • Лёзненскі • Міёрскі • Пастаўскі • Полацкі • Расонскі • Сенненскі • Талачынскі • Ушацкі • Чашніцкі • Шаркоўшчынскі • Шумілінскі •• Гарады:  Віцебск • Наваполацк • Орша • Полацк