Беларуска-эфіопскія адносіны

З пляцоўкі Вікіпедыя
Jump to navigation Jump to search

Беларуска-эфіопскія адносіны — адносіны паміж Рэспублікай Беларусь і Федэратыўнай Дэмакратычнай Рэспублікай Эфіопія. Дыпламатычныя адносіны паміж дзяржавамі ўстаноўлены ў маі 1994 года.

У 2013 годзе адкрыта Пасольства Беларусі ў Эфіопіі. Пасол Эфіопіі ў Расіі Касахуна Дэндэра Мелесэ з 15 студзеня 2012 года акрэдытаваны ў Беларусі па сумяшчальніцтве. 3 снежня 2013 года Паслом Беларусі ў Эфіопіі прызначаны Дзмітрый Георгіевіч Куптэль, які ўручыў даверчыя граматы Прэзідэнту Федэратыўнай Дэмакратычнай Рэспублікі Эфіопія 20 жніўня 2014 года (копіі даверчых грамат былі ўручаны Дзяржаўнаму Міністру замежных спраў Эфіопіі 17 студзеня 2014 года).

У траўні 2005 года для ўдзелу ў Міжнароднай выставе «MILEX-2005» Беларусь наведалі Пасол Эфіопіі ў Расіі, ваенны аташэ і дарадца па эканамічных пытаннях. У ходзе візіту была арганізавана сустрэча з Міністрам адукацыі, намеснікам Міністра прамысловасці Рэспублікі Беларусь і Старшынёй БелГПП.

У сакавіку 2007 года адбыўся візіт Пасла Эфіопіі ў Беларусі ў суправаджэнні дэлегацыі прадстаўнікоў Назрэцкага трактарнага завода Эфіопіі, падчас якога былі праведзены сустрэчы з кіраўніцтвам міністэрстваў прамысловасці і замежных спраў Рэспублікі Беларусь.

У траўні 2009 года Старшыня Палаты прадстаўнікоў Нацыянальнага сходу Рэспублікі Беларусь Уладзімір Андрэйчанка накіраваў у адрас Старшыні Савета народных прадстаўнікоў Федэральнага сходу Федэратыўнай Дэмакратычнай Рэспублікі Эфіопія Тэшомэ Тогі запрашэнне наведаць Рэспубліку Беларусь з візітам на чале дэлегацыі. Эфіопскі бок адклаў візіт на нявызначаны тэрмін.

У 2010 годзе падчас візіту ў Мінск дарадцы па ГЭУ Пасольства Эфіопіі ў Маскве абмяркоўвалася пытанне наладжвання супрацоўніцтва паміж рэгіёнамі Беларусі і Эфіопіі. Эфіопскі бок прапанаваў разгледзець пытанне падпісання адпаведнага пагаднення паміж Мінскам і г. Адама (Назрэт).

У траўні 2014 года ў г. Мінск адбыўся візіт Пасла Эфіопіі ў Расіі і Беларусі і яго сустрэчы ў МЗС і Міністэрстве адукацыі Рэспублікі Беларусь.

У жніўні 2014 года эфіопскі бок пацвердзіў гатоўнасць да падпісання пагаднення аб устанаўленні адносін гарадоў-пабрацімаў ​​з Партызанскім раёнам г. Мінска.

22 верасня 2014 года Пасольствам быў перададзены праект пагаднення ў адміністрацыю г. Адама (Назрэт), паводле інфармацыі эфіопскага боку дакумент знаходзіцца на разглядзе ў юрыдычным упраўленні адміністрацыі горада.

C 14 па 15 кастрычніка 2014 года праведзены першы тур кансультацый паміж МЗС на ўзроўні намеснікаў міністраў замежных спраў, беларускую дэлегацыю ўзначаліў намеснік Міністра замежных спраў Рэспублікі Беларусь В. Б. Рыбакоў.