Беларус на чужыне

«Беларус на чужыне»
Тып	часопіс
Палітычная прыналежнасць	Беларускі незалежніцкі народна-хрысціянскі рух[d]
Мова	беларуская
Тыраж

«Беларус на Чужыне» — часопіс. Выдаваўся ў Лондане (Вялікабрытанія) з кастрычніка 1947 г. па красавік 1950 г. Выйшлі 42 нумары.

Першы нумар выйшаў 7 кастрычніка 1947 г. Ініцыятарамі выдання былі Аляксандр Надсан і Якуб Амор (Кастусь Кадушка), яны ж былі найбольш актыўнымі аўтарамі. Часопіс меў палітычна-інфармацыйную скіраванасць. Публікаваліся агляды міжнароднай палітыкі, зацемкі пра навуковыя дасягненні брытанскай і сусветнай навукі, аналіз згадак іншамоўнай прэсы пра беларусаў, артыкулы па праблемах беларускага арганізацыйнага жыцця, беларуская эміграцыйная хроніка і інш.

Часопіс быў цесна звязаны са Згуртаваннем беларусаў Вялікабрытаніі. Друкаваўся часткова кірыліцай, а часткова лацінкай. Рэдактарам найдаўжэй выступаў Аляксандр Надсан (першым рэдактарам, верагодна, быў Вінцэнт Жук-Грышкевіч). Аўтары былі як з Брытаніі, так і з-за яе межаў.

Ад лютага 1949 г., ад № 3(27), «Беларус на Чужыне» стаў афіцыйным выданнем Беларускага незалежніцкага народна хрысціянскага руху — палітычнай арганізацыі беларусаў Вялікабрытаніі. Аднак асноўныя выдаўцы не змяніліся. Часопіс выходзіў да красавіка 1950 г., калі пабачыў свет яго апошні нумар, № 18(42). Прычыны спынення выдання былі звязаныя галоўным чынам з рээміграцыяй аўтараў, якія сталі пакідаць Вялікабрытанію.

Літаратура

• Гардзіенка Н. Беларусы ў Вялікабрытаніі / Наталля Гардзіенка; пад рэд. А. Гардзіенкі. — Мінск: Медысонт, 2010. — С. 203—206.